Ramazan'da cemaatle vitr kılarken imamın kunutu unutması

 

Ammâ cemâatle kılınan salât-i vitrde imâm, kunutu sehv ile terk idüb kırâetden ferâğında rukû'a gitdikde, cemâat mütâbaat ve imâm ile beraber rükû' itmek lâzım iken kıyâmda sâbit idüb imâma mütâbaat itmemeleriyle, imâm geri kıyâma dönüb duâ-i kunutu okudukdan sonra tekrar rükû'unda, cemâat imâma mütâbaat itdiklerinde, imâmın nemâzı sahîh ise de, cemâatin nemâzları fâsid olur zira imâm ibtidâki yalnız kendi eylediği rükû'uyla farzı edâ itdiğinden ikinci rükû'u nâfile olub cemâatin rükû'u henüz edâ olunduğundan farz olmağla imâma rükû'da iktidâları sahîh olmaz. Bu sûretde cemâatin salât-i vitri iâdeleri lâzım olur. Bu mes'eleden ekser-i nâs gâfillerdir. Âlim geçinenlerden suâl olundukda salât-i vitri münferiden kılanın, kunutu sehven terk ile rükû' itdikden sonra kunut hâtırına gelüb geri kıyâma dönüb kunutu kırâet idüb tekrar rükû' itmesi mes'elesinin cevâbını virirler. Bu ise mes'ele-i uhrâdır. Halbuki şehr-i Ramazân-ı şerîfde, salât-ı vitr cemâatle kılınmağla imâmın kunutu sehvi ve cemâatin ve imâmın, vech-i mezkûr üzre amellerinin vukû'u kesîrdir. Nemâzın fesâdından nice kimsenin haberi yokdur.

(Dürr-i Yektâ Şerhi)